Hörgársveit tekur þátt í þjóðarsátt um verðstöðugleika

Sveitarstjórn Hörgársveitar hefur lýst yfir fullum vilja til þátttöku í þjóðarsátt um verðstöðugleika og vill með því leggja sitt af mörkum til sameiginlegs átaks um aukinn efnahagslegan stöðugleika og vernd kaupmáttar heimila.

Sveitarstjórn telur mikilvægt að sveitarfélög, ríki og atvinnulíf vinni saman að því að halda aftur af verðhækkunum og stuðla að meiri fyrirsjáanleika fyrir heimili og fyrirtæki. Gjaldskrár sveitarfélaga eru einn þeirra þátta sem sveitarstjórnir hafa áhrif á og því er mikilvægt að horfa til þeirra við þetta sameiginlega verkefni.

Sem liður í þessu hefur sveitarstjórn Hörgársveitar samþykkt að gjaldskrárhækkanir sveitarfélagsins á árinu 2027 verði ekki umfram 2,5%. Með því er leitast við að halda hækkunum í hófi og draga úr þeim kostnaðarauka sem íbúar og þjónustunotendur sveitarfélagsins verða fyrir.

Ákvörðunin verður höfð til hliðsjónar við gerð fjárhagsáætlunar Hörgársveitar fyrir árið 2027. Jafnframt verður áfram lögð áhersla á ábyrgan og sjálfbæran rekstur sveitarfélagsins og að tryggja góða þjónustu við íbúa.

Með þátttöku sinni í þjóðarsátt um verðstöðugleika vill Hörgársveit sýna ábyrgð og leggja sitt af mörkum til þess að skapa stöðugra rekstrarumhverfi og meiri fyrirsjáanleika fyrir íbúa og atvinnulíf í sveitarfélaginu.