Bróðir minn Ljónshjarta
Um viðburðinn
Bróðir minn Ljónshjarta er hugljúf stríðssaga af þeim bræðrum Snúð og Jónatan. Yngri bróðirinn Snúður er dauðvona en Jónatan reynir að hughreysta Snúð með því að segja honum hvað gerist eftir dauðann. Eftir stutta jarðneska dvöl hittast bræðurnir aftur í Nangijala eins og þeir höfðu talað um. Þar er lífið himneskt eða ætti öllu heldur að vera það, það er svikari í Kirsuberjadal sem aðstoðar það grimma í þeim heimi, Riddaranum Þengli og hans fólk ásamt eldspúandi drekanum Kötlu sem eiga sitt aðsetur í Þyrnirósadal.
Leikfélag Hörgdæla setur nú upp verkið Bróðir minn Ljónshjarta í félagsheimili sínu að Melum. Alls eru 15 leikarar í sýningunni og fleiri tugir manns sem koma að sýningunni með einum eða öðrum hætti. Leikfélag Hördæla var stofnað árið 1997. Saga leiklistar í Hörgárdal er þó mun lengri. Bindindisfélagið Vakandi og leikdeild Ungmennafélags Skriðuhrepps höfðu staðið fyrir leiksýningum allt frá árinu 1928.
Leikfélag Hörgdæla og fyrirrennarar þess setja reglulega upp leiksýningar á félagsheimilinu að Melum í Hörgárdal sem er lítið en hlýlegt hús sem var byggt árið 1934. Sýningar á Melum hafa getið sér gott orð, til að mynda Með fullri reisn sem var sett upp árið 2011 og verkið Í fylgd með fullorðnum árið 2020. Það verður enginn svikinn af heimsókn á Mela.
Leikstjóri sýningarinnar er Kolbrún Lilja Guðnadóttir en hún hefur mikla reynslu úr leiklistarheiminum. Þetta er í fyrsta skipti sem hún leikstýrir hjá Leikfélagi Hörgdæla en þó ekki í fyrsta skipti sem hún kemur á Mela þar sem hún lék í Gauragangi árið 2019. Kolbrún leikstýrði Fólkinu í blokkinni árið 2023 í Freyvangsleikhúsinu og Tröll sem leikfélag VMA setti upp árið 2022.
Svavar Knútur hannar hljóðheiminn í sýningunni en hann þekktur tónlistarmaður hefur getið sér góðan orðstír sem bæði flytjandi og lagahöfundur bæði hérlendis sem og alþjóðlega undanfarin ár. Svavar var fyrstur til að hljóta verðlaun úr minningarsjóði Önnu Pálínu Árnadóttur fyrir framlag sitt til íslenskrar vísnatónlistar, hrífandi túlkun, nýsköpun í söngljóðagerð og lagasmíðum, endurnýjun hins þjóðlega tónlistararfs fyrir alla aldurshópa og starf í þágu ungra og upprennandi tónlistarmanna.
Bróðir minn Ljónshjarta er eftir Astrid Lindgren. Astrid er einn þekktasti barnabókahöfundur heims og mörg hafa lesið bækur hennar í grunnskóla en hennar þekktustu verk eru bækurnar um Línu langsokk, Emil í Kattholti, Ronju ræningjadóttur og Kalla á þakinu. Til eru margar kvikmyndir og leikrit sem byggð eru á sögum hennar. Leikgerð er eftir Evu Sköld og þýðandi er Þorleifur Hauksson.
Í SÝNINGUNNI VERÐA STROBE LJÓS SEM KUNNA AÐ VALDA ÓÞÆGINDUM!