Þróunarverkefni búgreina og Matvælasjóður

Starfsfólk SSNE veitir ráðgjöf til aðila sem hafa áhuga á að sækja um í þessa sjóði og er eru upplýsingar um tengiliði á vef þeirra SSNE.is

Frá Matvælaráðuneyti Íslands:

Matvælasjóður

Matvælasjóður opnar fyrir umsóknir 1. febrúar 2024 vegna fjórðu úthlutunar sjóðsins. Umsóknarfrestur er til miðnættis 29. febrúar 2024.

Hlutverk Matvælasjóðs er að styrkja þróun og nýsköpun við framleiðslu og vinnslu íslenskra matvæla og hliðarafurða þeirra úr landbúnaðar- og sjávarafurðum á landsvísu.

„Sem fyrr leggur sjóðurinn áherslu á þróun og nýsköpun í innlendri matvælaframleiðslu“ segir Svandís Svavarsdóttir matvælaráðherra. „Við viljum að íslensk matvælaframleiðsla jafnist að gæðum á við það sem best gerist á heimsvísu og á þeirri vegferð eru vegvísar okkar hringrásarkerfið, sjálfbærni og fæðuöryggi“.

Sjóðurinn veitir styrki í fjórum flokkum:

  • Bára styrkir verkefni á hugmyndastigi og fleytir hugmynd yfir í verkefni.
  • Kelda styrkir rannsóknaverkefni sem miða að því að skapa nýja þekkingu.
  • Afurð styrkir verkefni sem komin eru af hugmyndastigi og leiða af sér afurð, sem er þó ekki tilbúin til markaðssetningar
  • Fjársjóður styrkir sókn á markaði og hjálpar fyrirtækjum að koma sínum verðmætum á framfæri.

Umsækjendur eru hvattir til að kynna sér flokkana og handbókina vel áður en farið er í að vinna umsókn. Uppfærð handbók verður aðgengileg á heimasíðu sjóðsins þegar nær dregur.

Einungis verður tekið við umsóknum í gegnum Afurð sem er stafrænt stjórnsýslukerfi matvælaráðuneytisins.

Sjá frétt á vef stjórnarráðsins

Þróunarverkefni búgreina

Athygli er vakin á að umsóknarfrestur um þróunarverkefni búgreina er til 15. mars 2024. Auglýst er eftir umsóknum tvisvar á ári.

Opnað hefur verið fyrir umsóknir í Afurð, stafrænu stjórnsýslukerfi matvælaráðuneytisins.

Í nautgriparækt eru styrkhæf þau verkefni sem talið er að styrki íslenska nautgriparækt og fela í sér rannsóknir og þróunarverkefni.

Í sauðfjárrækt eru styrkhæf þau verkefni sem talið er að styrki íslenska sauðfjárrækt og falla undir kennslu, rannsóknir, leiðbeiningar og/eða þróun í sauðfjárrækt.

Í garðyrkju eru styrkhæf þau verkefni sem talið er að styrki íslenska garðyrkju og falla undir ráðgjafaverkefni, kynningaverkefni, rannsókna- eða tilraunaverkefni, vöruþróunarverkefni, verkefni sem miða að því að draga úr losun gróðurhúsalofttegunda og endurmenntunarverkefni.

Umsóknir berist á Afurð.

Sjá frétt á vef stjórnarráðsins